Sot mbahet kongresi i shtatë ndërkombëtar për Shkenca Mjekësore, i cili ka për qëllim ngritjen e vetëdijes dhe interesimit të profesionistëve dhe studentëve të rinjë të shkencave mjekësore, mbi rëndësinë e punës, projekteve e hulumtimeve shkencore.

Kongresi i shtatë ndërkombëtar për Shkenca Mjekësore, projekti i Organizatës për Arsim, Shkencë dhe Shëndetësi “KISCOMS”, po ashtu, ka për qëllim edukimin dhe zhvillimin e vazhdueshëm profesional të profesionistëve dhe studentëve të shkencave mjekësore, duke mundësuar akumulimin e kredive të nevojshme për licencim dhe rilicencim.

Ndryshe, në gjashtë kongreset e mbajtura deri me tani, në Kosovë, Shqipëri dhe Maqedoni, kanë marrë pjesë mbi 3500 profesionistë shëndetësorë dhe janë prezantuar mbi 300 punime shkencore.

Kongresi i shtatë ndërkombëtar për Shkenca Mjekësore, realizohet në bashkëorganizim me Ministrinë e Shëndetësisë, Universitetin e Prishtinës „Hasan Prishtina“, Universitetin e Gjakovës „Fehmi Agani“, Kolegjin e Shkencave Mjekësore „Rezonanca“, Kolegjin „Fama“, Kolegjin „Universi“, Akademinë Italiane të Nutricionit dhe Dietologjisë, si dhe Institucionet tjera shtetërore, shëndetësore, arsimore e shkencore në Republikën e Kosovës./Arbresh.info/